Dóttur- og eignaumsýslufélög

Vörður tryggingar hf. er alhliða vátryggingafélag sem býður þægilega tryggingaþjónustu fyrir heimili og fyrirtæki með ánægju viðskiptavina að leiðarljósi. Þegar áföll verða þá stöndum við með viðskiptavinum okkar.

Viðskiptavinum Varðar hélt áfram að fjölga á árinu og eru þeir nú liðlega 67.000, þar af eru fyrirtæki um 6.400, en markvisst hefur verið unnið að stækkun á hlut fyrirtækja í tryggingastofninum. Á sama tíma jukust tekjur af vátryggingum umtalsvert eða um 15%, sem styður við markmið félagsins um vöxt og aukna markaðshlutdeild sem var komin í um 18,5% i lok september.

Sjálfbærni og samfélagsábyrgð

Markmið Varðar er að bjóða viðskiptavinum viðeigandi vátryggingavernd á samkeppnishæfu verði. Jafnframt að rekstur félagsins sé til fyrirmyndar í íslensku atvinnulífi, og er ekki eingöngu horft til fjárhagslegra markmiða sem tengjast arðsemi og hagkvæmni, heldur einnig til umhverfismála, félagslegra þátta og stjórnarhátta.

Í sjálfbærnimálum er unnið eftir stefnu sem mótuð er til þriggja ára í senn. Stefnan kveður á um vilja félagsins til að vinna af heilindum að sjálfbærnimálum og hafa jákvæð áhrif á hagaðila með því að gæta að beinum og óbeinum umhverfis- og félagslegum áhrifum í starfsemi sinni og styðja við heimsmarkmið Sameinuðu þjóðanna.

Umhverfisþættir

Vörður hefur á síðustu árum lagt áherslu á að halda umhverfisáhrifum af starfsemi sinni í lágmarki. Félagið horfir til skuldbindinga Íslands við Parísarsáttmálann. Losun hvers árs er kolefnisjöfnuð hjá Kolviði, en um er að ræða losun vegna eldsneytisnotkunar, rafmagnsnotkunar, vatnsdreifingar, flugs, úrgangs, aðfanga og ferða starfsfólks til og frá vinnu og á vinnutíma.

Félagslegir þættir

Samfélagsábyrgð Varðar grundvallast á því að starfa af heilindum til hagsbóta fyrir alla hagaðila, eins og viðskiptavini, starfsfólk, eigendur og samfélagið í heild. Félagið sinnir þessu hlutverki með því meðal annars að fara fram með góðu fordæmi hvað jafnrétti, sanngirni og mannréttindi varðar og hvetja aðra, svo sem birgja og aðra hagaðila, til hins sama.

Áhersla er og verður á forvarnir. Með markvissu forvarnarstarfi stuðlar Vörður að því að fækka slysum og tjónum hjá viðskiptavinum og í samfélaginu í heild. Vörður vinnur út frá því markmiði að vera fremst í forvörnum á íslenskum tryggingamarkaði með áherslu á öryggi, heilsu og umhverfi. Með því að virkja starfsfólk í þátttöku forvarnarstarfs og innleiða forvarnir og öflugt áhættumat í ferla félagsins færumst við í átt að settum markmiðum. Vörður leggur áherslu á náið samstarf í öryggismálum við fyrirtæki.

Stjórnarhættir

Stjórnarháttum Varðar er ætlað að stuðla að opnum og traustum samskiptum stjórnar, hluthafa, viðskiptavina og annarra hagaðila félagsins. Góðir stjórnarhættir leggja grunninn að ábyrgri stjórnun og ákvarðanatöku, með það að markmiði að skapa samfélagsleg verðmæti.

Rekstrarafkoma

Rekstur Varðar gekk í meginatriðum vel á árinu 2023. Markmið um vöxt, aukna markaðshlutdeild, aukinn hlut fyrirtækja í stofninum og rekstrarkostnað undir 20% náðust. Þá var 2,3 milljarða viðsnúningur í fjárfestingatekjum.

Veðurfarslegar aðstæður geta haft mikil áhrif á afkomu vátryggingafélaga. Einkum á það við um fjölda og alvarleika umferðatjóna en válynd veður geta einnig leitt af sér fleiri tjón á fasteignum og á það jafnt við um heimili og atvinnuhúsnæði. Fyrstu mánuðir liðins árs voru einkar erfiðir veðurfarslega þar sem snjóþungi, frosthörkur og að endingu asahláka ollu álagi á bæði bíla og fasteignir. Lagnir í sumarhúsum eru t.d. viðkvæmar fyrir kuldatíð. Að öðru leyti settu húsbrunar mark sitt á árið sem margir hverjir leiddu til hárra bótagreiðslna. Tjón vegna bruna á árinu voru margfalt hærri en sést hefur áður hjá Verði og að svo stöddu lítum við svo á að um einstakt ár hafi verið að ræða en ekki vísbendingu um nýjan veruleika. Eftir afar erfitt ár á fjármálamörkuðum 2022 varð góður viðsnúningur í afkomu á því sviði þrátt fyrir að árið hafi verið sveiflukennt.

Heildarfjöldi tilkynntra tjóna var liðlega 24 þúsund á árinu og fjölgaði þeim um 1.500 á milli ára. Á sama tíma jókst tjónakostnaður um 18%, sem má eins og áður segir fyrst og fremst rekja til brunatjóna.

Verkefnin fram undan

Nýr forstjóri tók til starfa á árinu og hefur í kjölfarið verið unnið að endurskipulagningu á ýmsum þáttum í starfsemi Varðar. Breytingar hafa orðið á stjórnendahópi félagsins og hefur Vörður nú á að skipa hópi starfsfólks sem í sameiningu hefur mikla þekkingu á tryggingum en einnig reynslu af öðrum sviðum sem kemur sér vel fyrir félagið. Vörður er því vel í stakk búinn til að mæta áskorunum framtíðarinnar, sem verða án efa fjölbreyttar og spennandi.

Framtíðarhorfur

Stefnumótun til næstu ára byggist á þeirri sýn að Vörður verði besti kostur viðskiptavina þegar kemur að vörum og þjónustu á tryggingamarkaði. Lykilþættir í stefnunni eru framúrskarandi þjónusta við viðskiptavini, vöruval sem mætir þörfum þeirra og sanngjörn verðlagning. Leiðir að markmiðinu felast í samstarfi við móðurfélagið Arion banka og aðra aðila um vöruframboð, nýsköpun og ekki síst forvarnir, sem eru afar mikilvægt samfélagsmál.